غير مصنف

7 مليون وظيفة شاغرة!

Reading Time: 2 minutes

قرأت في احد المقالات إن الولايات الأمريكية مقدمة على فترة من أكثر الفترات اللي لاتتوافق فيها المهارات المطلوبة في السوق مع المهارات الموجودة .. في حوالي 7 مليون وظيفة شاغرة ومش موجود

من يناسب يملأها بكفاءة ..
هذا الشي دفع كثير من كبريات الشركات زي آبل وجوجل إنها تكون متساهلة ومنفتحة مع كثير من الشروط اللي كانت سابقة مهمة زي الشهادة الجامعية.. وبدل من التركيز على المسميات الوظيفة والخبرة السابقة اتجهت الشركات للتركيز على المهارات اللي يمتلكها المتقدم والإضافات اللي ممكن يضيفها..
وكانت النصيحة اللي ينصح بها كثير من خبراء التوظيف هي إنه الشخص يركز في السيرة الذاتية تبعه على المهارات اللي يجيدها ويبرزها ..

من رأيي إن هذا التحول ممكن يكون مدخل لشباب كثير متحمسين وكانت تعيقهم العوائق التقليدية من شهادة وخبرة .. في النهاية الجميع بشكل أو بآخر محكوم ومتأثر بالسوق الأمريكي بالذاااااااااااااااات السوق التقني .. حتى وإن مش بشكل مباشر .. و كل واحد واجتهاده وشطارته ..

على السيرة .. وزيما أحب دائماً إني أقرأ التقارير اللي تصدرها لينكد-إن سنوياً بخصوص المهارات الأكثر طلباً .. وهذي السنة كانت :

المرتبة الأولى كانت للحوسبة السحابية أو Cloud Computing
واللي بنظري شي متوقع مع تربع عملاق البيانات الكبيرة على عرش الأصول الأكثر أهمية في العالم .. فمن المنطقي إن الشركات تتجه للكلاودز عشان تقلص من كلفة تخزين البيانات ..

المرتبة الثانية كانت للذكاء الاصطناعي أو Artificial Intelligence
معتقدش ان في حد كمان متفاجئ .. السنوات القادمة 100% هي سنوات الذكاء الاصطناعي بامتياز .. الذكاء الاصطناعي اللي فعلاً يمسني ويمسك .. اللي هو في كل شي تتعامل معه بشكل يومي .. في وسائل السوشل ميديا .. في إنترنت الأشياء …الخ

المرتبة الثالثة كانت المنطق التحليلي أو Analytical Reasoning
كمان مجال مرتبط بالذكاء الاصطناعي .. لأنه في النهاية له علاقة بطريقة صنع القرارات واللي هي الخطوة الثانية للذكاء الاصطناعي بعد عملية جمع البيانات ..

المرتبة الرابعة كانت لإدارة البشر أو People Management
هذي المرة مجال مالوش علاقة مباشرة بتقنية المعلومات .. بس يمكن من كثر التقنية الناس نست كيف تتعامل مع البني آدمين 😛

المرتبة الخامسة كانت لتصميم تجربة المستخدم أو UX Design
وهذي من المهارات اللي قدلنا كم سنة نشوفها متربعة على مراتب متقدمة في قائمة المهارات المطلوبة .. في النهاية المستخدم أمام سوق شرس من التطبيقات والمنصات المتنافسة والقيمة السوقية لكل تطبيق تزداد بزيادة الوقت اللي يقضيه هذا المستخدم داخل تطبيقك وهذي هي أهمية هذا التخصص ..

زيما انتو شايفين .. المهارات غالبها تقنية .. عشان كذا أني مؤمنة جداً بالتقنية لأنها من وجهة نظري هي من أهم مخارج البطالة ومش أي مخرج .. مخرج مشرف .. ومخرج ممكن يكون مدخلنا جميعاً للثورة الصناعية الرابعة اللي هي ثورة المعلومات .. هذا غير ان تدريباتها ودوراتها متاحة أونلاين وبأسعار تنافسية ولأي جمهور .. وتقدروا تزوروا الكورسات اللي طورتها لينكد-إن نفسها لكل مهارة وتشتغلوا عليها .. أو أي منصة تعلم ذاتي تحبوها .. المهم ان الطريق والسوق مفتوحين لكل من عنده طموح ومثابرة ..

مقالات شبيهة تلاقوها على مدونتي هنا.

أتشرف بمتابعتكم

Music vector created by studiogstock – www.freepik.com

0
السابق
كيف تتأقلم مع التغيير في حياتك

اترك تعليقاً

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.